Пририхтуюци перше число нашого часопису Русинистични студиї - Ruthenian Studies упатрали зме ше и на други подобни часописи и глєдали одвитуюци ришеня у випатрунку и технїчним пририхтованю текстох. Кед вишло перше число, видзели зме же даєдни ствари требало лєпше або дакус иншак поробиц. Прето у тим чишлє дацо мeняме и виправяме, а на концу даме прецизни упутства будуцим автором як треба оформйовац тексти. Свидоми зме же єст вельки розлики у пракси технїчного оформйованя текстох, наводзеня литератури, способу цитованя итд. аж и у часописох котри ше видаваю на Филозофским факултету у Новим Садзе, прето зме одлучели превжац праксу основного часопису нашого факултету – Годишњака Филозофског факултета у Новом Саду.

У часопису и далєй будземе публиковац роботи на шицких славянских и главних шветових язикох. Редакция ше будзе намагац за шицки роботи котри сцигню у предвидзеним чаше найсц еминентних рецензентох так же би голєм єден нє бул зоз редакциї часопису, а буду ше друковац лєм тоти роботи котри достаню позитивни рецензиї. Авторе длужни випочитовац зауваги и пригварки рецензентох, або евентуално у контакту з редакцию и рецензентом виришовац евентуални спорни питаня.

Мушиме сообщиц и єдну смутну вистку: у маю того року у 56. року живота умар Любомир Белей, професор Националного универзитета у Ужгородзе, визначни українски линґвиста, автор числених наукових роботох, а велї од нїх були пошвецени язику и култури Руснацох у Югославиї/Сербиї. У тим чишлє публикуєме єдну його статю. На концу часописа даваме кратке огляднуце о живоце и дїялносци проф. Любомира Белея.

Шлїдуюцого року Руснаци у Сербиї буду означовац 100-рочнїцу од снованя Руского народного просвитного дружтва (РНПД), котре у периодзе медзи двома шветовима войнами одбавело барз значну улогу у културно-просвитним и националним живоце Руснацох на тих просторох. Тому значному ювилею будзе у идуцим року пошвецена окремна наукова конференция, наздаваме ше, и обявени зборнїк роботох з тей конференциї. Прето поволуєме наших сотруднїкох и авторох же би за треце число часопису пририхтовали роботи пошвецени дїялносци РНПД, гоч то нє будзе одлучуюци услов же би роботи котри сцигню до редакциї були опубликовани у нїм.

Наздаваме ше же ше круг наших сотруднїкох будзе преширйовац и же наш часопис здобудзе угляд у славистичней науки. Циль нам же би часопис Русинистични студиї – Ruthenian Studies бул отворени полиґон за виношенє наукових досцигнуцох у обласци русинистики, наукових розправох и полемики, алє без уношеня до науки дньовей политики и интересней идеолоґиї котри би могли гамовац и гартушиц науку.

Щиро поволуєме на сотруднїцтво заинтересованих русинистох и тих котри ше занїмаю з питанями русинистики и тим цо блїзке русинистики.

У Новим Садзе 14. 11. 2018. року.

Главни редактор

Проф. др Янко Рамач