Уж длугши час ше чувствує потреба у русинистики мац наукови часопис у котрим би ше друковало науково роботи з тей науковей обласци. Орґанизованє Медзинародней науковей конференциї Велькосц малих язичних, литературних, историйних и културних традицийох 2012. року и зборнїка роботох Русинистични студиї – Ruthenian Studies 2015. року указало же Оддзелєнє за русинистику Филозофского факултету у Новим Садзе, на котрим орґанизовани студиї русинистики у найширшим смислу, од основних и мастер студийох по докторски студиї, и дзе анґажовани русинисти рижних профилох филолоґиї и историйних наукох, може позберац науковцох зоз жеми и иножемства котри ше занїмаю зоз русинистику же би могли ефикаснєйше сотрудзовац. Намира нам же би часопис позберал науковцох котри ше занїмаю зоз питанями русинистики, цо би у пракси оможлївело лєгчейшу медзисобну комуникацию, понеже тоти авторе обявюю свойо твори у розличних часописох у рижних жемох и то вельо раз очежує науковцом провадзиц шицко тото цо им може буц интересантне у їх науковей роботи.

Циль нам же би часопис Русинистични студиї – Ruthenian Studies бул отворени полиґон за виношенє наукових досцигнуцох у обласци русинистики, наукових розправох и полемики, алє без уношеня до науки дньовей политики и интересней идеолоґиї котри би могли гамовац и гартушиц науку.

Плануєме видавац часопис раз до рока и притримовац ше основних принципох видавательней дїялносци Филозофского факултету котри го видава.

Щиро поволуєме на сотруднїцтво заинтересованих русинистох и тих котри ше занїмаю з питанями русинистики.

 

Редакция

Објављено: 20. 03. 2018.